Manood tayo!

Kanina sa klase, hindi kami nagkaroon ng leksyon. Nanood kami ng mga video na magagamit namin para makapag-desisyon sa kung anong cultural na produkto ang nais naming suriin. Sa blog entry na ito, nais kong ikumpara ang videos na napanood ko at kung ano ang mga ideya ko ukol sa mga ito.

Unahin natin ‘yung videos ng Survivor Philippines Season 1 at ‘yung ginawa sa Palau. Bale, sa parehong videos, kapansin-pansin ang pagpapakita ng mga katawan ng mga kalahok. Tingin ko sobrang lantad talaga ‘yung mga katawan nila. Kumpara doon sa Survivor Philippines Season 1, mas sobra at higit na lantad ang mga katawan sa Survivor Philippines sa Palau. Isa pang napansin ko rito ay marami sa mga kalahok ay mga may itsura- gwapo at maganda, tapos parang mga modelo sa mga magasin. May ilan na normal lang ang itsura pero higit pa rin ‘yung talagang mga glamorosa. Sa aking palagay, ‘yung pangangatawan ng mga kalahok ay talagang nako-commodify. Dahil sa paglantad ng katawan, lalo na kung matipuno tapos magaganda, tiyak na maraming manonood nito. Isa pa, ‘yung napansin ko, sa una ipapakita nila ‘yung lugar tapos ‘yung magaganda’t kakaibang matatagpuan sa lugar na ‘yun- siyempre ako bilang manonood, naakit sa ganda ng lugar, akala ko lugar lang ‘yung ipapakita tapos biglang mga tao na halos hubad na. Mas lantad din ang mga katawang ng babae kumpara sa mga lalaki. Kapag dating naman doon sa mismong lugar o tagpuan, natural ‘yung lugar pero ‘yung vibe ay hindi kasi siyempre may mga kamera roon siyempre kapag may kamera, iba ‘yung galaw ng tao eh, maiilang sila kaya hindi maipapakita ‘yung natural na galaw nila. Tapos noon, ‘yun nga noong sinabi sa amin ng aming propesor na mayroong transgendered/ transexual, nagulat ako kasi doon sa video ng Survivor Philippines: Palau akala mo talaga ay purong babae tapos lalaki. Nakakatuwa na kahit na ganoon siya ay hindi siya nahiya kaya pa rin niyang ipagmalaki kung sino siya. Tapos biruin mo pinakita niya na hindi dapat mina-marginalize ang mga tulad nila.

Ikalawa naman, ‘yung Last Song ni Elton John. Hindi ko rin kasi kilala si Elton John pero nang lumabas na siya doon sa video, inisip ko na parang hindi tuwid na lalaki siya tapos ‘yun nga pinaliwanag sa amin ng aming propesor na hindi siya tuwid na lalaki (bakla raw siya). ‘Yung sa kanta niya, dapat mapanood ng lahat ng tao ‘yun eh lalo na ‘yung sobra mang-diskrimina sa mga bakla at tomboy. Hindi naman kasi sila dapat tinataboy eh, tao rin naman sila, hindi naman nila kasalanan kung  ‘yun ang naging kasarian nila hindi ba? Oo ginusto nila ‘yun at dapat respetuhin natin sila kasi hindi naman nila tayo inaano eh. May kwento ako: may pinsan kasi ako na medyo bakla bakla, nasa in-denial stage pa siya. Bale napansin ko na ‘yun dati pa kasi siyempre sa pagkilos niya- mapilantik, daming nilalagay sa katawan tapos ang bagal pa kumilos. Oo inaamin ko tinutukso ko siya pero hanggang doon lang ‘yun sinabihan ko pa nga siya na okay lang kung bakla siya eh wala namang masama roon basta ba wala siyang natatapakang tao. Kaso nga lang ‘yung tatay niya at tatay ko sinasabihan na kung may magiging bakla raw sa pamilya ibibitin nila patiwarik. Siyempre natakot magladlad ‘yung pinsan ko. Sabi ko kung patuloy siyang matatakot hindi niya malalaman ang tunay na pagkatao niya eh ‘di nandoon ‘yung pakiramdam na may kulang sa pagkatao mo. Matino naman siya eh, masipag mag-aral hindi naman na dahil bakla na siya eh sasama at mag-iiba na ‘yung tingin namin sa kanya eh. Sa umpisa mahirap tanggapin kasi sa father side siya ‘yung unang lalaking apo, pero ganoon talaga eh, saka ‘yung pagiging bakla niya hindi naman nakakabawas sa pagkatao ‘yun eh.

Tapos ‘yung sunod na video naman ay ‘yung kanta sa Hunchback of Notre Dame: God Save The Outcasts. Eto ‘yung kantang inawit ni Esmerelda na nagpapahiwatig sa kung paano tratuhin ng mga nakakariwasa at normal na tao sina Quasimodo at ‘yung iba pa. Sa bawat lipunan, hindi na maaalis na may mga ma-di-discriminate at ma-ma-marginalize. Ganoon kasi ginawa ang ibang lipunan eh. May mga taong mapag-mataas at mata-pobre na akala mo kung sino sila pero higit naman na mas masasama sila kaysa sa mga inaapi nila. Mahirap kasi sa lipunan na ganoon, sobrang onti lang ng mga tao na nagpapakita ng malasakit sa iba kaya ang Maykapal na lamang ang makakapitan nila. Sa awiting ito, makikita kung paano ang paghahati-hati ng antas sa lipunan nina Esmeralda noon tapos na sobrang halaga ng pisikal na anyo. Pinakita rin na madalas ang mga tao ay sobra humiling ng mga materyal na bagay para sa sariling benepisyo at kaunti lamang ang walang hinihingi kundi ang pagkakaisa at pagkapantay-pantay sa lipunan.

Panghuli, ang mga video doon sa Kapuso Mo, Jessica Soho na ukol sa mga bakla na may pang-lalaking trabaho- boceador, kaingero at umaakyat pa sa coconut tree. Tapos si Lady Gagita pa! Tapos ‘yung sa macho gays, na sobrang kikisig na mga lalaki tapos ‘yun pala bakla. Sa mga video na ito, makikita na ang kasarian na taglay nila ay hindi sagabal sa kung ano ang nais at hangarin sa buhay. Ang lipunan lamang ang gumagawa nang malaking usapan dito eh. Ano naman kung bakla o tomboy sila- wala na ba silang karapatan at kalayaan? Hindi dapat ganoon ‘yun. Sobra lang kasi manghugas ang ibang tao sa lipunan natin eh. 

Sana kasabay nang pagdaloy ng panahon ay pagtanggap natin sa bawat tao sa ating lipunan kasi hindi natin namamalayan na kaya hindi rin umaasenso ang lipunan natin ay dahil sa sobra tayo mang-mata at man-discriminate nang ibang tao eh.